SAMAHANG ILOKANO - KABAGIS

From National President Roman Roger Wanasen:

Kakabagis ko iti Samahang Ilokano,

Ti tawen nga 2009 ket naglabas manen iti biag tayo, adu dagiti padas, parikut ken pannubok nga napasamak iti biag tayo ngem aggiaman tayo iti Dios a Namarsua ken Manakabalin amin ta saan natayo nga binaybay-an, numanpay adu nga ladingit ken riribok nga simmangbay ket adda latta iti kundaway tayo nga inted iti Apo nga malasatan dagitoy nga didigra. Baro nga tawen manen iti umay iti sumagmamano nga aldaw, ket allokoyen kayo kakabagis ko nga iti ayat ken kappia ket agtalinaed kuma iti pus-puso tayo. Kariten kay pay nga kakabagis ko nga iwaksi tay kuma iti gurang-gura ket pagtalinaeden tayo ti bileg iti panagmay-maysa. Ikkaten tay kuma pay iti dakes nga panunot nga aguman tayo dagiti pada tayo nga tao nangnangruna kadagiti kakabagis tayo. Saan tay kuma nga us-usaren iti Organisasyon para iti bukod tay laeng nga pasaya-atan no diket para kuma iti pagsayaatan iti kaaduan. 1976 nak pay nga nagbalin nga miembro iti daytoy nga organisasyon tayo ket adu nga rigat ken sakripisyo nga impaay ko met tapno rumang-ay ken saan kuma nga mapukaw daytoy nga nag-maymaysaan tayo. Nangrugi-ak nga "neophyte", Member, MI, chapter President, Governor, over-all President, National youth President ken NationaL President, binusbos ko iti oras ken panawen para la iti organisasyon ken pag-ammoyo met kakabagis ko nga saanak nga nagdaw-dawat iti kuarta kadagiti miembro para iti gastusen nga mangipataray daytoy nga organisasyon. Amin nga provincial chapter tayo ket pagarupek nga napas-yar ko amin manipud Region 1, 2, 3 ken agraman ti Mindanao. Saanla nga siak ti nangted iti kastoy nga ayat no diket adu pay nga kakabagis tayo iti pimmusay ti biagna, saan nga nakaadal ken napopok pay iti pagbaludan para lang iti organisasyon. Mano nga tawenen nga daytoy organisasyon tayo ket awan iti programa na ken turungen na ket adda ti buteng ko nga daytoy Samahang Ilokano ket agin-inut nga mapukaw ta awan met iti papanan na. Adda kakabagis tayon nga napan iti Guardian, Mason ken dadduma pay nga organisasyon, ket makitak nga baka dumteng iti aldaw daytoy naka-iyanakan tayo nga Samahang Ilokano ket agin-inut nga mapukaw. Sapay kuma nga dagiti nadutukan nga opisyales iti National ket agkuti da kuma tapno agtalinaed kuma iti pwersa ken bileg iti Samahang Ilokano.

Alawen kakabagis ko, iti tawen nga 2010 ket agbalin kuma nga ballaigi tayo ken iti organisasyon. Agpipinnakawan tayo no adda man guranggura wenno naglabsingan iti tungal maysa. ket ipalubos tay kuma nga mareppet tayo iti maymaysa nga ayat ken tarigagay. Ikararag tayo iti Apo nga Namarsua dagiti isu amin nga plano ken aramiden tayo, ta pagarupek nga dina katayo baybay-an ken bendisyonan na dagiti amin nga un-unnoy ti tungal maysa kadatayo.

Ulitek kakabagis ko, nga kabla-awan kayo iti naragsak nga Paskua yo amin ken naparabur nga Baro a Tawen!!!

Toy Kabsat yo,

Roman Roger Wanasen